10.11.2009

MV終審庭 之 《Honey》

Artman 剛剛推出關於「蝴蝶歌姬」瑪麗亞雞兒小姐的專題﹐論及他的摯愛十大。除了在他的網誌留言自己的心水歌曲之外﹐更戲言會寫一篇有關單曲《Honey》MV的小品作回應。

其實一直很喜歡收看楓葉國電視音樂頻道Much Music 一個名為《Video on Trial
節目節目毫無裝潢﹐只由三四丁口沒遮攔的「陪審員」(其實是法官才對)﹐在MV旁加油添醋﹐評語往往一矢中的。

這日《MV終審庭》在敝博開業大吉﹐選來了雞兒小姐1997年的《蜜糖兒》來作首宗案例﹐可說養兵千日用在一時。

_______________________________________

Honey
導演﹕Paul Hunter

片長﹕六分四十四秒
MV序幕係加勒比海波多黎各一隅。失驚無神彈出字幕﹐「在任務完成前……」﹐然後馬上又接上﹕「代號﹕蜜糖兒」﹐可以說象徵整個MV概念﹕上文不對下理。

特務M 被「殘酷不仁」反情報組織綁架﹐組織正確名稱應該係 M.O.R.O.N.

組織命令﹕要不擇手段將M 特務拘禁。哇﹐好緊張好緊張啊﹗

鏡頭一轉﹐zoom out 第一號場景﹕San Juan 某毫華大宅。裡面沒有疑似五姨太物體。

下一個鏡頭係呢個MV嘅主角﹕四吋高金屬高跟鞋。同清代嘅紮腳習俗相比﹐呢隻鞋可說係人間十大極刑之首。點解醫學界無聲討呢個MV﹖

一開口﹐M 特務一輪嘴用西班牙語表達自己﹐聽到壞人甲一頭煙。I am sorry too!

不知為什麼從這個角度看來﹐M特務好似剛剛從北京周口店出土﹐唔通missing link 尚在人間﹖

呢句話個MV出現得最多﹐亦觀眾從頭到尾內心嘅吶喊。(搞咩? 搞咩?)

哦﹐原來M特務唔明白壞人甲髮型。咁M特務又點解釋自己頭上發生咩事﹖

壞人甲被M特務髮型評語窒親﹐於是換上壞人乙。換人期間﹐M特務苦苦哀求一梳香蕉。

壞人乙近距離和M特務接觸﹐M特務用滿腔熱血挺胸相抗。

M特務原來唔係要求一梳香蕉﹐係要求一片香口膠。

M等務然後用性感最啜核表情講出﹕香口膠係俾你﹗簡直梅麗史翠葆都睇到氣血翻湧﹐要拜佢為師。

當壞人丙以為M特務頭大冇腦狒狒地﹐原來M特務真係一個女特務喎!唔知點樣佢竟然開咗手扣﹗ 我諗﹐阿M特務咁厲害﹐點解又會落壞人手上呢﹖ I don't understand.

M特務靜雞雞離坐而起。對金屬造鞋竟然粒聲到冇?

壞人丙真係冇改錯名﹐被M特務丙到五體投地。

M特著住對高跟鞋雞咁腳走佬都唔拗柴﹐觀眾未經專人訓練﹐千祈唔好模仿。

壞人乙及壞人丙話﹕唔通我哋連個著緊身裙四吋高跟鞋女人猿都追唔到﹖

一貶眼M特務已狂奔數十公尺外﹐顯然係國際高跟鞋田徑會選手!

唔好問我M特務點樣擒上條欄河上面﹐不過佢咁都企得穩﹖

導演驚死觀眾唔信M特務會跳......

於是用兩個鏡頭上下夾攻﹗

M特務一插入水已經忍唔住要剝衫﹐唔通件衫有牙﹖

緊身裙下面原來係一套肉色比緊尼三點式泳衣。證明佢唔係真無腦﹐一早預知會咁樣逃生

呢個故事教訓大家:衫!一定要剝﹐但四吋鞋浸死都要著﹗

佢從二樓跳落游泳池深區﹐游足一個塘到淺水地方上水﹐仲施施然好似游早水

M特務又靜雞雞鼠入一個白色帳篷內。點解會有個帳篷呢到﹖ I don't understand?

原來M特務真有先見之明﹐一早將自己細軟放呢度。大家要留意呢副黑超﹐因為佢M特務戴過又冇再出現

死都唔肯除四吋鞋竟突然唔見

肉色比緊尼三點式泳衣上面要再穿上件長袖露腿wet suit﹐唔通佢對玉腿唔怕hypothermia?

四吋鞋竟突然又出現!

導演顯然驚觀眾跟唔切劇情﹐於是用字幕指出﹐M特務以水上電單車逃亡﹐換完衫仲係一路領先﹗

M特務四萬咁口喪笑﹐直情未驚過﹗

正當我睇呢場水上追逐睇到入神﹐雞兒小姐突然又以歌手身份同一班著水手裝舞蹈藝員室內起舞! 前一幕同呢一幕唯一有關﹐仍然係果對四吋鞋﹗

唔夠三分鐘﹐已經換四套衫。佢對手臂成日都好用力催谷架﹗

好啦﹐導演又剪返追逐條片﹐M特務手車咁勁﹐壞人乙同壞人丙自然人仰船翻。

MV開始個小島﹐原來係目的地﹗

一到目的地﹐M特務馬上換另一件低胸衫﹐電番個髮﹐然後玩水﹗佢份工真大壓力﹗

接觸達成﹗觀眾有眼睇﹐唉。

代號﹕蜜糖兒。我知。即係咩意思呢﹖男主角係美藉古巴裔靚仔 David Fumero 佢MV犧牲自我演出連連吃招 !

M特務第一招「飛擒大咬」。

M特務第二招「枯藤纏樹」。

M特務第三招上下其手

M特務絕招「張果老倒騎驢」。兩人lur晒地。

M特務仲帶埋隻狗Jack返工﹖

任務係完成。不過究竟個任務係咩呢﹖睇完好R頭。

5 comments:

Ogake said...

勁勁勁~ 你寫得好仔細~
勁過寫影評呀~~
MC只要靚就得~ 佢理得有無logic~

Leo said...

no point before 6.00:P

best actor said...

ogake:

thank you la! 至於MC往後嘅霹靂大肉腸系列MV﹐反而已是司空見慣﹐冇咁震撼 :o)

leo:

in terms of "camp", the MV may be reaching a whooping 9.9... LOL

lemon tree said...

MC姐手姐腳,扮特務真係笑死人。差點忘記佢曾經憑Glitter成為「金草莓」得獎人,演技果然有番咁上下水皮 :p

best actor said...

MC可以勝任很多我國名著的角色﹐如褒姒妲妃閻婆惜李瓶兒等。至於女特務嘛﹐好像太考煞世人的想像力。 :oP

LinkWithin

Related Posts with Thumbnails